Immadu ti populasyon dagiti Persons Deprived of Liberty iti Baguio City Jail Female Dormitory iti agdama.
Iti panakiuman ti Bombo Radyo kenni Senior Jail Officer 4 Marjorie Bigwil, Assistant Warden ti Baguio City Jail Female Dormitory, kinunana nagbalinen a pitopulo ti bilang dagiti balud manipod iti sigud nga innem-a-pulo ket lima a bilang dagitoy idi napan a lawas.
Iti nasao a bilang, kaadwan kadagiti kaso dagiti balud ket adda ti pakainaiganna iti iligal a droga nu sadino, dumanon daytoy iti tallopulo ket walo, bayat a dumanon met iti tallopulo ket dua dagiti kaso nga awan ti pakainaiganna iti panagaramt iti iligal a droga.
Iti baet a congested ti nasao a dormitoryo,dinakamat ti opisyal a kabaelan paylaeng nga iyakomodar ti espasyo daytoy dagiti balud.
Iti sabali a bangir, agtultuloy met ti pannakaipatungpal dagiti nagduduma nga aktibidad ken programa para iti salun-at dagiti balud nangruna ita a panagtutudo.
Sigun metlaeng kenni Bigwil, adda ti nadutukan a nurse a nakaduty iti bente kuatro oras nu sadino, dagitoy ti responsable iti panakaipaay iti vitamins ken agas kadagiti balud, kasta met a dagitoy ti agbanbantay kadagiti addaan iti sakit.
Mainaig iti dayta, impasigurado ti opisyal a saan nga agkurkurang dagiti balud kadagiti basic needsda gapu ta agtultuloy ti panangipaay dagiti service providers ti tulong para kadakuada.//Bombo Jez Lapizar