BAGUIO CITY – Bimmaba ti bilang dagiti nadiskobre a bomba ken bala iti rehiyon Cordillera ita a tawen nu idilig idi napalabas a tawen.
Iti interview ti Bombo Radyo kenni PSSg. Randy Angday ti Regional Explosive Canine Unit-Cordillera (RECU-CAR), dinakamatna a 378 ti bomba ken bala a nadiskobreda ita a tawen nu idilig iti 922 a nairekord idi napan a tawen.
Nadiskobre dagiti nasao a war materials babaen iti education campaign nga impatpatungpalda kadagiti komunidad, pagadalan, lokal a gobyerno ken dadduma pay a law enforcement units.
Sigun kenni Angday, nangrugi nga insayangkatda ti “Awareness on Bomb that kills life and destroy properties” wenno ABAKADA idi napalabas a tawen tapno maisuroan ti publiko.
Inlawlawagna nga iti kanito nga adda ti madiskobre a bombo ken bala ket nasken a maiproseso ti papelda sakbay a maipatulod iti national headquarters.
Iti kanito nga aprubaran ti headquarter ket ditoyen a maibiyahe idiay Tarlac gapu ta awan ti disposal area iti rehiyon Cordillera.
Inyunay-unayna met ni PSSg. Angday a nu adda ti masarakan a bomba ket rumbeng nga ireport a dagus kadagiti otoridad.
Imbinglayna nga idi kallabes a tawen ket adda ti indibidual a nasabugan ti bomba gapu ta pinadasna a minartilyo, winelding ken rinagadi gapu iti pammati nga adda ti balitok.
Iti agdama ket awan pay ti nairekord a kapada nga insidente.//Wilmea Pacpacan
