BAGUIO CITY – Posible a maksayan ti bilang dagiti contact tracers ditoy Cordillera Region gapu iti manamnama a panagpaso ti kontrata dagitoy ita a bulan ti Disyembre.
Maibasar ti datus ti Department of Health ken ti Department of the Interior and Local Government, 314 ti grupo ti contact tracers a naiwaras iti Cordillera, pakairamanan dagiti 4,292 a contact tracing personnel.
Gapu iti daytoy, kinuna ni Contact Tracing Czar ken Baguio City Mayor Benjamin Magalong nga agkiddaw ken agsapul daytoy iti pondo para iti sweldo ken panakailaylayon ti kontrata dagiti contract tracers ti rehion.
Dinakamat met ni DOH-Cordillera Regional Epidemiology and Surveilance Unit Nurse Karen Lonogan a kasapulan latta ti naan-anay ken epektibo a contact tracing tapnu mabantayan a nalaing dagiti kaso ti COVID-19.
Inyunay-unayna nga adda ti posibilidad a ngumato latta ti kaso ti COVID-19 iti rehion gapu iti panaglam-ek ti klima ita a panawen.
