BAGUIO CITY – Immado dagiti umili ti Cordillera Region a nakarehistro ita iti Commission on Elections (COMELEC) para iti May 9, 2022 National and Local Elections.
Iti panakiuman ti Bombo Radyo Baguio, dinakamat ni Atty. Vanessa Roncal, Assistant Regional Director ti COMELEC-Cordillera a pakabuklan a 1,077,900 ti pinal a bilang dagiti rehistrado a botante iti rehion Cordillera.
Sigun kenkuana, sinukimat ken imberipikar ti Central Office ti COMELEC ti nasao a datus.
Nangatngato ti nasao a bilang no idilig iti bilang dagiti botante ti rehion iti national and local elections idi May 13, 2019 ken idi May 9, 2016.
Maibasar iti rekord ti komisyon, nasurok iti 1,013,000 ti bilang dagiti registered voters iti eleksion idi 2019 nupay agarup 795,800 ti nagbotos a katukad ti 78.53% a voter’s turnout.
Nasurok met iti 755,700 ti nakipaset iti eleksion idi 2016 a katukad ti 83.40% ti nasurok 906,000 a registered voters iti nasao a panawen.
Innayon pay ni Atty. Roncal nga agtultuloy ti panagsaganada para iti eleksion inton sumaruno a tawen babaen iti panagsanay dagiti trainors a mangsanay met kadagiti mannursuro ken dadduma a personnel nga agserbi iti mismo nga aldaw ti eleksion.
Dinakamatna a 2,168 ti clustered precinct iti entero a Cordillera ken tallo a mannursuro ti agserbi iti tunggal voting precinct.
Sigun kenkuana, agal-ala ita ti COMELEC kadagiti mannursuro a kayatda ti agserbi iti masungad nga eleksion.
Malaksid iti daytoy, tuttutukan pay ti COMELEC-Cordillera ti koordinasyonda kadagiti maseknan nga ahensia para iti panakasurot ti health protocols bayat ti aldaw ti eleksion, ti kinatalged ti signal para iti transmission ti datus ken ti linak ken kappia.
