BAGUIO CITY – Bimmaba ita ti bilang dagiti estudyante iti siudad ti Baguio a makipaspaset kadagiti immunization programs ti Baguio City Health Office a paset dagiti school-based programs ti opisina.
Sigun kenni City Health officer Dr. Rowena Galpo, naobserbaranda ti nasao a banag iti baet nga awan kadagiti estudyante iti rehion Cordillera ti nabakunaan iti kontrobersial a Dengvaxia.
Inaklonna a naapektaran dagiti school-based programs dagitoy ditoy siudad maipapan iti panagbakuna gapu iti isyu ti Dengvaxia a nangitunda iti panagbuteng dagiti nagannak ken dagiti estudyante.
Kinunana a saanda a mapilit dagiti estudyante nga agpabakuna gaputa no adda ti immunization program ket kasapulan ti waiver wenno pammalubos a pirmaan ti nagannak.
Gapu iti daytoy, impalawag ni Dr. Galpo a dagiti bakuna nga ipapaayda kadagiti estudyante ket dagiti bakuna a nabayagen a maipapaay kadagiti estudyante ken pagsayaatan dagitoy dagiti ubbing.
Kabayatanna, nagyaman met daytoy gaput saan a naapektaran ti national immunization program para kadagiti ubbing nga agtawen iti maysa nga agpababa.
