BAGUIO CITY–Ngimmato ti bilang dagiti estudyante iti elementarya ken sekondarya iti Benguet a sumrek inton Lunes para iti school year 2019-2020 no idilig iti bilang dagitoy idi napalabas nga school year 2018-2019.
Sigun kenni Nestor Bulayo, assistant schools division superintendent ti DepEd-Benguet, inton Lunes ket nasurok 78,400 nga estudyante iti elementarya ken sekondarya ti sumrek kadagiti pagadalan iti probinsia.
Kinunana a nangatngato daytoy no iti nasurok 77,000 nga enrollees idi napalabas a tawen.
Nupay kasta, dinakamatna a bimmaba ti bilang dagiti enrollees iti elementarya iti nasurok 24,600 manipud iti nasurok 24,700 idi 2018.
Innayona a ti student to teacher ratio iti rural areas ket maysa a mannursuro tunggal duapulo ket walo nga estudyante bayat nga iti urban areas kas iti La Trinidad ket maysa a mannursuro tunggal uppat a pulo nga estudyante.
