BAGUIO CITY – Manamnama a manayonan ti pwersa dagiti health workers ditoy siudad ti Baguio kasaruno ti panggep a panangala ti lokal a gobierno iti kanayunan bilang dagitoy.
Sigun kenni Mayor Benjamin Magalong, maikonsidera a kritikal ti human resource ti siudad gaputa ngumatngato ti bilang dagiti health workers a makapkaptan ti COVID-19.
Gapu iti daytoy, kinunana a nasken laeng a manayonan ti pwersa dagiti health workers tapnu mangipaay ti serbisyo kadagiti pasyente ti siudad nangruna dagiti nakaptan ti COVID-19.
Dinakamatna nga agala dagitoy ti 30 a health workers a swelduan ti lokal a gobierno.
Kinunana a maiwaras dagiti nasao a health workers kadagiti nagduduma a pagagasan iti siyudad.
Malaksid iti daytoy, kinuna ni Mayor Magalong a nagkiddawda ti 20 a kanayunan a health workers manipod iti Department of Health ken maur-uray laengen ti sungbat ti nasao nga ahensya seknan iti daytoy.
