BAGUIO CITY – Manamnama a ngumato ti bilang dagiti indibidual nga agturong iti Baguio City Public Market kagiddan ti umadanin a paskua wenno holiday season.
Iti interview ti Bombo Radyo kenni Ceasar Emilio, Supperindent ti Baguio City Public Market, kinuna a manamnama inton sumaruno a lawas ti panagngato ti bilang dagiti costumers nga agturong iti merkado publiko.
Sigun kenkuana, naannayas ti taray ti uneg ti merkado publiko babaen iti panakitinnulongda iti Public and Order Safety Division (POSD) ken kadagiti pulis.
Kabayatanna, kinuna ni Emilio nga awan pay ti natiliwda a substandard a pagkiloan.
Nupay kasta, impettengna iti publiko nga agreport dagitoy kadagiti otoridad nu masaorda iti kilo dagiti ginatangda a produkto.
Impeksana pay a no adda dagiti matiliwan a palso a kiloan ket mabalin a maipaayan ti notice of violation dagiti vendor.
Iti sabali a bangir, impaganetget ni Emilio a maiparit ti panag-carol ken panagpalama iti uneg ti merkado publiko.
Malaksid iti dayta, kinunana a manamnama ti panag-adu ti basura iti merkado kagiddan ti pannakarambak ti holiday season iti siudad.//Rosemarie Bulsao
