BAGUIO CITY – Manayonan pay dagiti maideklara a Minahang Bayan ditoy rehion Cordillera.
Sigun kenni Mines and Geosciences Bureau (MGB) – Cordillera Regional Director Fay Apil, dumanonen iti pito ti naideklara a Minahang Bayan ditoy rehiyon kasaruno iti panaka-aprobar ti maysa nga aplikasyon para iti daytoy sadiay Abra.
Kinunana a tallo ti Minahang Bayan a naideklara sadiay Benguet, dua sadiay Apayao ken saggaysa sadiay Mountain Province ken Abra.
Dinakamatna met nga adda pay ti dua a Minahang Bayan a manamnama a maideklara sakbay a malpas iti umuna a semestre ti agdama a tawen.
Nupay kasta, inaklon ni Apil a maysa paylaeng a Minahang Bayan ti naipaayan ti Small-Scale Mining Contract wenno ti katulagan para iti panagbingay ti gobyerno ken ti small-scale mining contractor wenno ti grupo dagiti minero a mangminas iti Minahang Bayan.
Iti baet daytoy, kinunana a manamnama a manayonan ti nasao a bilang gaputa agal-ala metten ti maysa nga asosasyon dagiti minero sadiay Sagada, Mountain Province ti Small-Scale Mining Contract.
