BAGUIO CITY- Impeksa dagiti health authorities ditoy siudad ti Baguio ti killaat a panagngato iti bilang dagiti matmatay a masikog kabayatan ti agdama a pandemya.
Sigun kenni City Health Officer Dr. Rowena Galpo, adda ti panagngato iti maternal mortality rate ditoy siudad kadagiti napalpalabas a tawen ngem killaat a ngimmato iti 67.65% idi napalabas a tawen manipud iti 45.19% idi 2019.
Kinunana a gapu iti daytoy ket addan ti pagkasapulan para iti panangipatungpal dagiti health workers iti umno a panakiballaet.
Inlawlawagna a maysa a rason iti killaat a panagadu dagiti masikog a pimmusay ditoy siudad ket ti mapapati a panagbuteng dagitoy nga agpakonsulta kadagiti health facilities, nangruna kadagiti ospital gapu iti panagngato ti kaso ti COVID-19 idi napalabas a tawen.
Innayonna a maysa pay a rason ti implementasyon ti enhanced community quarantine a nanglapped iti panagturong dagiti tattao kadagiti health facilities tapnu agpakonsulta.
Iti baet daytoy, inyapela ni Dr. Galpo ti panagkonsulta dagiti masikog kadagiti kaasitgan a health facilities iti lugar dagitoy tapnu maprebentaran ti ipupusay bayat ti panagsikog dagitoy.
Naamuan nga iti agdama ket dua ti lisensiado a birthing facilities ditoy siudad a masaerakan iti Atok Trail District Health Center ken Irisan Health Center bayat a nakapila para iti lisensia dagiti health centers sadiay Pinsao, Pacdal, Atab ken Loakan.
