BAGUIO CITY – Ngimmato ti bilang dagiti motorista a naglabsing iti Anti-Road Obstruction (ARO) Ordinance ti siudad ti Baguio iti maudi a kwarter ti 2017.
Maibasar iti rekord ti Traffic Enforcement Unit (TEU) ti Baguio City Police Office, iti bulan ti Oktobre agingga Disyembre idi napalabas a tawen ket dimmanon iti agarup 13,500 ti bilang dagiti natiliwda a naglabsing iti nasao nga ordinansa, nangatngato daytoy no iti agarup 13,000 a tiliwda iti kapada a kwarter ti 2016.
Naamuan nga iti maudi a kwarter ti 2017 ket nakatiliw dagiti traffic enforcers iti agarup 4,800 a motorista a naglabsing iti ARO Ordinance iti bulan ti Octobre; 4,850 idi Nobyembre ken nasurok 3,700 idi Disyembre.
Sigun met kenni PCI Denver Guzman, deputy traffic chief iti siudad, dakkel ti tulong ti ARO Ordinance iti panakaikkat dagiti lugan a nakabangen wenno nakasali iti pagnaan.
Innayonna a napimpintas met no kanayon a maiyemplementar ti ARO iti amin a barangay ditoy siudad nangruna ta sumagmamano kadagitoy ti saan a mangipatpatungpal iti nasao nga ordinansa.
