BAGUIO CITY – Naksayan ti bilang dagiti motorista nga aglablabsing kadagiti linteg trapiko ditoy rehion Cordillera a matiltiliw ti Land Transportaion Office (LTO) – Cordillera.
Iti interview ti Bombo Radyo Baguio, kinuna ni LTO-Cordillera Legal Division Acting Chief Atty. Jessie Balagot a naobserbaranda ti naksayan a bilang dagiti matiltiliw a motorista ita a tawen no idilig kadagiti naglabas a rekord dagitoy.
Kinunana nga agtultuloy ti serye ti checkpoint operations nga ipatpatungpalda tapnu maipasigurado ti panagtulnog dagiti motorista kadagiti linteg ken pagalagadan iti trapiko.
Dinakamatna nga ita ket manmano laeng dagiti maaw-awatda a reklamo kontra kadagiti motorista kas iti reckless driving, saan a nakarehistro a lugan, awanan ti lisensia a driver, kolorum a lugan ken saan a panagisuot ti seatbelt.
Gapu iti daytoy, patienna nga ita ket nakasursuron dagiti motorista nga agtulnog kadagiti nagduduma a linteg trapiko.
Nupay kasta, palpalagipanna latta dagiti motorista iti agtultuloy a panagtulnog dagitoy kadagiti linteg trapiko tapnu saan dagitoy a matiliw ken mamulta wenno mairaman iti aniaman nga aksidente iti kalsada.
Inyunay-unayna pay a babaen iti panagsurot iti linteg trapiko ket masigurado met ti kinatalged dagiti pedestrians, pasahero ken dagiti mismo a motorista.
