BAGUIO CITY – Dumanonen iti 254,440 nga umili iti siyudad ti Baguio ti nagparehistro iti National I.D wenno 77.16% manipud iti 329,721 a puntirya a mairehistro.
Manipud iti nasao a bilang, nasurok 10,700 nga umili laeng ti nakaawat iti National I.D.
Iti met probinsiya ti Benguet, addan ti 295,483 nga umili wenno 71.12% manipud iti 415,450 a puntirya a mairehistro ti Philippine Statistic Authority (PSA)-Benguet.
Manipud iti nasao a bilang, 2,356 laeng kadagitoy ti nakaawaten ti I.D
Iti interview ti Bombo Radyo, kinuna ni Jude Lo, Focal Person ti PSA-Baguio-Benguet, impakaammo ti PSA-Central Office a nagnayondan ti printing machines tapno mapapartak ti panakaimprenta dagiti National I.Ds.
Inaklon ti opisyal nga adda dagiti umili a makatawenen a nagparehistro ngem agingga ita ket awan pay ti naaw-awatda a National I.D
Nupay kasta, inlawlawagna a centralized ti panakaimprenta dagiti National I.Ds ken adda pay dagiti sumagmamano a proseso a nasken a pagdalanan sakbay a maimprenta daytoy.
Iti baet daytoy, impanamnama ni Lo a maideliver dagiti I.Ds iti pagtaengan dagiti umili babaen iti partnershipda iti Philippine Postal Corporation (Philpost).
Kagiddan iti daytoy, guyguyogoyen manen ni Lo dagiti umili partikular dagiti agtawen iti lima nga agpangato tapno agparehistro dagitoy.
Sigun iti opisyal, saan nga amin nga agparehistro ita a tawen ket makaala ti National I.D ita a tawen ngem dagiti nagparehistro idi napan a tawen ket maalada ita a tawen.
