Ngimmato manen ti bilang dagiti pimmusay nga indibidual gapu paylaeng iti severe dengue iti probinsya ti Benguet.
Gapu iti daytoy, dumanonen ti sangapulo nga indibidual ti pimmusay iti nasao a sakit.
Maibasar iti kaudian a rekord ti Epidemiology Surveillance Unit ti Provincial Health Office, dua nga indibidual ti nainayon kadagiti sigud a rekord dagitoy.
Dagiti dua a kanayunan a pimmusay iti nasao a sakit ket residente paylaeng idiay La Trinidad ken Bokod, Benguet.
Kabayatanna, dumanon met iti 480 ti bilang dagiti baro a kaso a nailista no sadino nababa daytoy no idilig iti rekord kadagiti napalpalabas a lawas.
Gapu iti daytoy,pakabuklan iti 7,016 nga indibidual ti naapektaran iti nasao a sakit manipud January 1 agingga September 7 iti agdama a tawen.
Agtaltalinaed ti munisipyo ti La Trinidad kas addaan iti kaadduan a kaso a dumanon iti 2,065, sarunuen ti Itogon a nakailista iti 867 ken maikatlo ti Kabayan a nakailista iti 834.