Ngimmato iti 31 ti bilang dagiti pimmusay gapu iti panagduprak ti bagyo ken habagat iti pagilian.
Sigun iti Office of the Civil Defense (OCD), manipud iti nasao a bilang, 15 ti nailista idiay Benguet pakairamanan ti 10 iti siudad ti Baguio, dua idiay La Trinidad, ken tallo idiay Atok.
Uppat a pay a kaso ti ipupusay ti nailista idiay Rizal ken Batangas, dua idiay Occidental Mindoro ken sagaysa idiay La Union, Quezon City, Oriental Mindoro, Negros Occidental, ken Caloocan.
Kabayatanna, innayon ti nasao nga ahensya a dumanonen iti 2.2 milyon a pamilya a bukbuklen ti agarup 7.7 milyon nga indibidual ti apektado iti pagilian gapu iti agtultuloy nga epekto ti saan a nasayaat a paniempo.
Iti baet dayta, agtultuloy latta ti panangipapaay ti gobyerno iti tulong kadagiti naapektaran iti entiro a pagilian.