Dumanonen iti duapulo ket siyam ti bilang dagiti pimmusay gapu iti panakalmes bayat a mapukpukaw ti tallo nga indibidual iti pagilian ita a Holy week, sigun iti Philippine National Police (PNP).
Sigun kenni Philippine National Police spokeperson Police Jean Fajardo, nakailistada ti lima pullo ket innem a kaso nga insidente manipud Marso baente syete ti agdama a tawen.
Kinuna ni Fajardo a kangrunaan a napasamak dagiti panakalmes kadagiti beaches, private resorts ken karayan.
Ti Calabarzon ti nakailista ti kaadoan a bilang ti panakalmes a dumanon iti sangapulo, sarunoen daytoy ti Ilocos Region ken Cagayan Valley nga addaan ti tag-innem a kaso ken ti Bicol Region nga addaan ti lima a kaso.
Ti kaubingan a biktima ti panakalmes ket agtawen ti uppat bayat a ti kataengan ket agtawen ti pito pullo ket walo.
Kabayatanna, dagiti mapukpukaw a biktima ket nailista sadiay Rosales, Pangasinan; Jones, Isabela; ken Tumauini, Isabela.
Iti agdama, agtultuloy ladta ti panagbantay dagiti otoridad kadagiti beaches wenno seaports tapno maliklikan dagitoy nga insidente.
