BAGUIO CITY – Agtultuloy ti hot pursuit operations nga ipatpatungpal dagiti kameng ti Tuba Municipal Police Station kontra kadagiti maatap a kameng ti rebelde a grupo sadiay Camp 4, Tuba, Benguet a nangrugi pay idi rabii.
Immunan a kinuna ti mapagtalkan a source ti Bombo Radyo a kas maibasar iti report a nakalap ti Baguio City Police Office ket walo a tao ti pimmusay iti rinnupak, banag a saan pay laeng a kinumpirmar ti Tuba Municipal Police Station.
Maipalagip a nagwaras ti text message idi kalman a mangipatungpal iti riribok dagiti rebelde a grupo iti rehion Cordillera.
Mainaig iti nasao a damag, sinuspindir met ni Mayor Ignacio Rivera ti klase dagiti elementari sadiay Camp 4 Elem School.
Binalakadan pay ti pulisya dagiti residente sadiay Barangays Camp 1, Twinpeaks, Camp 3 ken Camp 4 nga agtalinaedda iti uneg ti balay dagitoy nu saan a napateg ti papananda wenno agbakwitda iti nataltalged a lugar.
