BAGUIO CITY–Nanayunan pay ti bilang dagiti narekober a bangkay sadiay Level 070, Sitio Firstgate, Ucab, Itogon, Benguet.
Iti agdama ket dumanonen iti 60 ti bilang dagiti nasarakan a bangkay iti nasao a lugar kalpasan a narekober ti kanayonan a lima a bangkay idi kalman.
Gapu iti daytoy ket nagbalinen nga 82 ti pakabuklan a bilang dagiti pimmusay iti intero nga ili ti Itogon, Benguet.
Manipud kadagiti pimmusay sadiay Barangay Ucab ket saan pay laeng a nabigbig ti walo kadagitoy bayat a 19 dagiti agtultuloy a masapsapul.
Immunan nga impeksa dagiti rescuers a nakasagana dagitoy a mangituloy iti search, rescue and retrieval operations iti nasao a lugar uray dumanon daytoy iti makabulan la ketdi masapulan ti amin a mapukpukaw.
Kabayatanna, dumanonen iti 107 ti pimmusay iti rehion Cordillera gapu iti bagyo nga Ompong.
Karaman iti listaan ti 87 a pimmusay iti probinsia ti Benguet, 13 iti siudad ti Baguio, innem sadiay Mt, Province ken maysa sadiay Kalinga.
Dumanon met iti 33 dagiti mapukpukaw pakairamanan ti dua nga indibidual iti siudad ti Baguio ken 31 iti probinsia ti Benguet.
