BAGUIO CITY – Mapagam-amkan a mapukawan iti trabaho ti ad-adu a Pinoy workers sadiay Oman gapu iti COVID-19 krisis.
Iti eksklusibo nga interbyu ti Bombo Radyo-Baguio, kinuna ni Labor Attaché Atty. Gregorio Abalos Jr. sadiay Muscat, Oman a nangrugin a napukawan iti trabaho ti dadduma nga OFWs sadiay manipud nangrugi ti lockdown ti Oman idi Marso 15.
Kinunana a manipud iti nasurok 58,000 a Pinoy workers sadiay Oman ken adun dagiti naapektaran ken naikkat iti trabaho ken posible nga agtultuloy ti nasao a parikot agingga a saan a maparmek ti COVID 19.
Gapu iti daytoy, dinakamatna nga agtultuloy ti panangtulong ti Philippine Overseas Labor Office (POLO) kadagiti apektado nga OFWs.
Innayonna a maipoproseso ti aplikasion dagiti apektado nga OFWs iti Abot Kamay ang Pagtulong (AKAP) program ti DOLE.
Nupay kasta, inaklon ni Abalos a posible a karkaro a rumigat ken bumayag ti pannakaipaay ti tulong kadagiti OFWs manipud ita nga aldaw ken kadagiti sumaruno pay a gundaway kagiddan ti makabulan nga obserbasion ti Ramadan.
Inlawlawagna pay a malimitaran ti pannakaiproseso dagiti tulong gapu iti limitado a panaggaraw kas maitunos iti Ramadan.
Kabayatanna, dinakamat ni Abalos a nagimbagen ti tallo a Pinoy frontliners sadiay Oman a nagpositibo iti COVID 19.
Dinakamatna pay a dumanonen iti nasurok 2,000 ti positibo a kaso ti COVID 19 sadiay Oman ken agtultuloy daytoy a ngumatngato.
