BAGUIO CITY – Inmado dagiti persons under monitoring (PUMs) seknan iti COVID-19 sadiay Atok, Benguet.
Iti panakiyuman ti Bombo Radyo kenni Mayor Raymundo Sarac, kinunana a dagitoy dagiti OFWs a residente sadiay a nagbakasyon ditoy pagilian ken dagiti nagbiahe sadiay Metro Manila a napan nagilako ti nateng ken sabong.
Dinakamatna nga idi kalman ket dimmanon iti 60 ti PUMs iti Atok nupay kontrolado ti kasasaad dagitoy.
Inaklon pay ti mayor a kas iti dadduma a munisipyo ket adda latta dagiti residente ti Atok a saan a sumursurot kadagiti balakad ken pagalagadan iti manarimaan nga Enhanced Community Quarantine partikular iti home quarantine.
Kabayatanna, imbilinna metlaeng ti panagala dagiti mannalon sadiay iti clearance ken certificates no agibiahe dagitoy paturong kadagiti trading areas sadiay La Trinidad.
Kinuna ni Mayor Sarac a nasken nga agala dagiti mannalon iti Special Travel Clearance manipud iti Barangay Hall ken iti Health Declaration Certificate manipud iti Barangay Health Stations.
Kinunana a kalpasanna ket agturong dagitoy iti Atok Municipal Police Station sadiay Sayangan, Paoay, Atok, Benguet para iti panagalada ti Travel Certificate wenno Travel Authority.
Inyunay-unayna metlaeng a ti mabalin nga agbiahe ket ti laeng driver ti lugan ken maysa a helper.
Innayon pay ti opisyal a no Sabado ken Dominggo ket iti Municipal Health Office sadiay Camp 30, Caliking ti pagalaan ti Health Declaration Certificate tapno makainana met dagiti dadduma a health personnel ti Atok.
