BAGUIO CITY – Malimitaran manen iti agingga 3,000 a turista tunggal aldaw ti bilang dagiti turista a mapalubusan a sumrek ditoy Baguio City.
Iti interview ti Bombo Radyo Baguio kenni City Tourism Legal Counsel Atty. Perlita Rondez, kinunana a manipud nasurot ti uniform travel protocol ti National IATF a nakaikkatan ti travel authority, medical certificate ken negative swab test result ket dimmanon iti 15,000 nga indibidual ti innaldaw nga agpaparehistro iti Baguio VIS.I.T.A. nga online registration system para kadagiti turista ken travelers a kayatda ti agturong ditoy City of Pines.
Sigun kenkuana, gapu iti kaadu dagiti agpaparehistro ket saan a nabaelan dagiti personnel ti City Tourism Office nga imaton ti nasao a visita app.
Nagresulta daytoy iti panagdesisyonda a malimitaran laengen ti bilang dagiti turista a mapalubusan a makastrek ditoy Baguio nangruna ta umadanin ti Semana Santa a maysa kadagiti panawen a kadawyan a pagturturongan dagiti turista ditoy siudad.
Palpalagipan pay ni Atty. Rondez dagiti turista ken travelers a kayatda ti agturong ditoy Baguio City iti panagparehistroda nga umuna iti Baguio VIS.I.T.A. tapnu makaalada ti QR-coded Tourist Pass ken mangisaganada ti maysa a valid ID, negatibo a resulta ti antigen wenno saliva wenno RT-PRC test a naala iti uneg ti 72 nga oras sakbay ti panagturongda ditoy Baguio.
Inlawlawagna a ti panangikalikagum manen ti Baguio LGU iti negatibo a resulta ti COVID-19 test kadagiti kayatna ti sumrek ditoy siudad ket intunda ti panagpositibo iti coronavirus ti sumagmamano a turista a naipasidong iti swab test idi nakadtengda ditoy Baguio.
Maibasar iti rekord ti City Tourism Office idi March 19, 12 kadagiti turista manipud iti 670 a turista a naipasidong iti antigen test ti nagpositibo iti COVID-19.
