BAGUIO CITY – Bimmaba ti bilang dagiti turista a nagturong iti siudad ti Baguio bayat ti holy week.
Daytoy ket maibasar iti datus ti Tourist Police Unit ken City Tourism Office.
Iti interview ti Bombo Radyo kenni PMaj. Harriet Bulcio, Information Officer iti Baguio City Police Office, kagiddan ti panagbaba ti bilang dagiti turista a nagturong iti siudad ket naimaniharda ti traffic congestion partikular iti central business district.
Sigun kenkuana, umdas ti personnel ti Baguio City Police Office a naiwaras iti nagduduma a tourist spot para iti seguridad ken linak ken kappia dagiti turista pakairamanan iti merkado publiko ken malls.
Kinunana a nakatulong ti advisory ket nainget a panakaipatungpal ti number coding iti panakaimaihar ti gunay ti trapiko iti siudad nu sadino awan ti nailaksid iti amin a drivers ken motorista pakairamanan dagiti bisita.
Nupay kasta, nailistada ti sumagmamano a panaglabsing kadagiti paganurotan iti trapiko ngem naimanehar ken dagus a nasolbar dagitoy.
Namnamaenna met nga agtultuloy ti panakitinnulong dagiti nagduduma a kameng ti ahensiya ken volunteers tapno ad-adda a mapagtalinaed ti linak iti siudad.//Bombo Marinel Rodrigo
