BAGUIO CITY – Dumanon laeng iti 5.62 percent ti nagbalin a tourist arrival ti Baguio manipud iti Oktobre agingga Disyembre ti napalabas a tawen 2020 no idilig iti bilang dagiti turista a simmangbay ditoy siudad iti Oktobre agingga Disyembre ti 2019.
Iti interview ti Bombo Radyo Baguio, kinuna ni City Tourism Officer Engr. Alec Mapalo nga iti tallo a maudi a bulan ti 2020 ket agarup 25,600 ti pakabuklan a bilang dagiti turista a nagturong ditoy Baguio babaen iti panagparehistroda iti Baguio VISITA platform.
Kinunana nga adayo a nababa ti nasao a bilang no idilig iti 455,000 a kadawyan a bilang dagiti turista a sumangsangbay iti Baguio iti kapada a bulan sakbay ti pandemya.
Dinakamatna metlaeng nga iti baet nga adda dagiti turista a nagturong ditoy siudad manipud Oktobre ket marikna latta dagiti dadduma nga accommodation stablishments ti epekto ti pandemya iti turismo.
Inlawlawagna a daytoy ket gaputa adda latta dagiti hotels nga awanan ti adu a guests ken adda pay dagiti awanan napasangbay a guests manipud iti ruar ti siudad.
Kagiddan iti daytoy ket impasigurado ni Engr. Mapalo a nainget ti proseso a pagdaldalanan dagiti turista nga agturturong ditoy siudad tapnu maipasigurado nga awan kadagitoy ti nakaimet iti COVID-19 ken awan kadakuada ti mangiyawid iti nasao a sakit.
