BAGUIO CITY – Dumanonen ti agarup 8,300 ti bilang dagiti turista a nakastrek ditoy Baguio City manipod Oktubre 29 agingga idi Nobyembre 1.
Maibasar iti datus ti Baguio City Tourism Office; 1,127 ti simmangbay idi Biernes, Oktubre 29 ken nagdoble idi Sabado, Oktubre 30 iti bilang nga 2,630.
Nailista met ti 2,430 a bilang dagiti turista idi Domingo, Oktubre 31 ken 2,097 idi Lunes, Nobyembre 1.
Nagtaud ti nasao a datus iti Central Triage sadiay Baguio Convention Center.
Nailawlawag met a saan pay a nainayon ditoy dagiti nagcheck-in kadagiti hotels nga addaan iti bukod a triage kas iti Baguio County Club, John Hay Manor ken Forest Lodge ken adda metlaeng dagiti VISITA travelers a nagdiretso iti triage ti pagdagusanda a hotel.
Maipalagip a nailukat manen ti borders ti siudad ti Baguio para kadagiti turista idi October 25, 2021 kagiddan iti panakaipasidong daytoy iti GCQ Level 3 nu sadinno inyunay-unay ti mayor ti siudad ti nainget nga implementasyon ti protocols iti iseserrek dagiti turista.
Maipalagip a 2,000 ti naituding a bilang dagiti fully vaccinated a turista a mapastrek iti siudad iti innaldaw.
Sigun kenni City Tourism Alec Mapalo, nainget ti panangwanawanda kadagiti turista a sumsumrek iti siudad, nangruna kadagiti non-complying tourists isut gapuna a dagiti saan a fully vaccinated wenno nakaimet ti biddut wenno peke wenno awanan ti QTPs ket mapaspasubli iti nagtaudan dagitoy.
