Nangrugin nga immadu dagiti turista a sumarsarungkar iti siudad ti Baguio kagiddan iti panagbaba iti presio iti gasolina, sigun iti Hotel and Restaurant Association of Baguio (HRAB).
Sigun kenni HRAB spokesperson Andrew Pinero, nangatngato ti bilang dagiti turista nu idilig kadagiti napalabas a bulan.
Dumanon iti 40% ti occupancy rate dagiti accomodation establishment tunggal weekdays ken dumanon iti 80-90% tunggal weekends.
Sigun kenni Pinero, nakatulong ti nasayaat a suplay iti gasolina ken ti panagadu dagiti conference, event, ken panangipatungpal iti kasar iti siudad tapno maisubli ti kumpiansa dagiti turista.
Agtultuloy metlaeng a mabisbista ti Baguio gapu iti nalam-ek a klima, nangruna kadagiti agsapsapul iti makapabang-ar a lugar iti nakaro a kinabara idiay Metro Manila ken iti dadduma pay a lugar.
