BAGUIO CITY–Bimmaba ti bilang dagti turista a nagturong iti Baguio City ita a lawas kasaruno ti pannakaikaligum manen ti negatibo a resulta ti COVID-19 test kadagiti indibidual nga agturong iti siudad.
Dinakamat ni City Tourism Officer Engr. Alec Mapalo a dumanon iti nasurok lima a ribu ti nagrehistro iti VISITA online.
Nupay kasta, nasurok sangaribu laeng ti simmangbay iti siudad gapu iti killaat a pannakaisubli dagiti travel restrictions.
Kinunana a manipud iti nasao a bilang, agarup 75% a turista ti saan a nagtuloy nangruna ta kaaduan kadagitoy ket manipud iti National Capiatal Region.
Maipalagip a karaman ti NCR kadagiti a saan a mapalubusan a sumrek iti siudad gapu iti nangato a kaso ti covid sadiay.
Nupay kasta, kinuna ti opisyal a makastrek latta dagiti indibidual manipud NCR no ti panggepda ket trabaho ken dadduma pay a napateg a transakyon ngem nasken nga addaanda iti negatibo a resulta ti RT-PCR test wenno Saliva Test.
