BAGUIO CITY – Nangipaulog ni Baguio City Mayor Benjamin Magalong a iti baro a pammilin a mangilaylayon iti maysa pay a lawas a restriksion iti iruruwar dagiti ubbing iti siudad.
Daytoy ket kalpasan a naobserbaran ti 41% nga ingangato ti kaso ti COVID 19 kadagiti agtutubo ken ubbing ditoy lokalidad.
Gapu iti daytoy, kinunana ti mayor a maikonsidera daytoy a dakkel a pakaseknan isu’t gapuna a saan a mapalubosan dagiti ubbing nga agturong kadagiti open areas tapnu malapdan ti panakaimpektarda iti napegpeggad a Delta variant.
Immapela pay ni Mayor Magalong kadagiti nagannak iti dagusda a panangireport kadagiti maseknan nga otoridad iti kanito a maobserbaranda ti aniaman a sintomas ti COVID19 kadagiti ubbing.
Kinunana nga agkamang dagitoy kadagiti aktibo nga health centers tapnu dagus a maipaayan ti medical assistance.
Dinakamatna pay a nangiwarasda iti antigen tests tapnu maipasidong a dagus ti testing dagiti maiyuman nga addaan iti iti virus.
