BAGUIO CITY – Dumanon ita iti 46 ti bilang ti identified wenno nabigbig a pasyente ti COVID-19 a nakaptan ti Delta variant ditoy siudad ti Baguio.
Kasaruno daytoy ti report ti Philippine Genome Center idi Oktobre 10 a panakairaman ti 14 a newly detected cases ti nasao a variant ti COVID-19 ditoy siudad.
Maibasar pay iti report ti contact tracing team ti Baguio, siyam kadagiti baro a kaso ti Delta variant ket kameng ti household clusters bayat a tallo ti nailista iti business process outsourcing wenno BPO cluster ken ti dua pay ket nailista iti grupo dagiti health worker ken iti government institution cluster.
Nairaman met iti biosurveillance report ti uppat a kaso ti Alpha variant ken dua a kaso ti Beta variant nupay dagitoy ket datus a naala idi pay Abril agingga Mayo.
Gapu iti daytoy, pakabuklan ita a 209 ti kaso ti variants of concern ditoy Baguio a bukbuklen ti 46 a kaso ti Delta varaint, 112 a kaso ti Alpha variant ken 51 a kaso ti Beta variant.
Naduktalan pay iti naisayangkat a link analysis ti contact tracing team ti siudad a pakabuklan a 7,210 nga indibidual ti addaan koneksion kadagiti pasyente a nakaptan kadagiti nasao a variant ti COVID-19.
