Dumanon iti walo a person of interest ti manarimaan nga im-imbetigaran dagiti kameng ti Bontoc Municipal Police Station a karaman iti ipupusay ti 2nd year Criminology Student idiay Samoki, Bontoc, Mountain Province.
Iti pannakiuman ti Bombo Radyo Cauayan kenni Police Major Ryan Wakat, hepe ti Bontoc Municipal Police Station, kinunana a napasamak ti insidente iti alas dos ti bigat idi adda ti gulo, a maysa kadagiti biktima ket ni Jeffgart Dongpopen, 21, 2nd year Criminology Student.
Agtultuloy ti naan-anay nga imbestigasion ti rason ti panagriri, ngem maibasar iti panangi-istoria ti kadua ti biktima, idi napasamak ti pannakakabkabil, maysa kadagiti suspek ti mapapati a nagkiddaw kenkuana iti sangapulo a pisos, a nangitunda iti saan a panagkikinnaawatan sakbay a rimsua ti riri.
Maibasar iti patta-patta ti Bontoc Municipal Police Station, agarup duapulo a tattao ti kataman iti gulo ken saan pay a nalawag no mano ti nangkabkabil iti estudiante a nangitunda ti ipupusayna.
Sigun kenni Wakat, daytoyen ti maikadua a gundaway a nakairekordda ti kapada a pasamak.
Iti kinapudnona, nangisayangkatda iti curfew rounds ken maysa ti nasao a restobar ti impaserrada iti alas diez ti rabii ngem mapapati nga idi nakapanaw dagiti kameng ti nasao a nga istasion ket naglukat manen ti bar iti alas onse ti rabii.
Kinunana a daytoy met ti tiempo a napan iti nasao a lugar ti biktima ken dagiti kakaduana ken ti grupo dagiti suspek.
