BAGUIO CITY – Dumanonen iti 14 ti positibo a kaso ti COVID-19 iti entero a rehion Cordillera.
Maibasar iti datus ti Deparment of Health – Cordillera iti alas-singko ti malem idi kalman, sag-dua ti positibo a kaso ti COVID-19 iti Benguet ken Abra bayat a ti 10 a positibo a kaso ket iti Baguio City.
Bukbuklen dagitoy ti pito a babbai ken pito a lallaki, no sadino, lima kadagitoy ti senior citizens nga agtawen ti 61 agingga 73 bayat a ti kaubingan ket agtawen iti 6.
Nagtaud iti ballasiw taaw ti tallo bayat a naaddaan iti panagbiahe sadiay National Capital Region ti pito ken iti CALABARZON ti maysa, partikular ti kaubingan; dua ti naaddaan iti close contact iti positibo a kaso ken maysa ti local transmission.
Nupay kasta, nailanad iti report ti DOH-Cordillera a bin-ig nga adda dagiti nasao a pasyente iti natalged a kondisyon.
Kabayatanna, pakabuklan a 311 ti persons under investigation (PUIs) iti entero a rehion kas maibasar iti datus ti DOH-Cordillera a bukbuklen ti 17 sadiay Abra; 53 sadiay Apayao; 106 iti Baguio City; 58 sadiay Benguet; 7 sadiay Ifugao ken sag-35 sadiay Kalinga ken Mountain Province.
Naamuan a 74 kadagiti PUIs ti nakaruar iti ospital bayat a 163 ti manarimaan a naka-home quarantine ken 74 dagiti adda paylaeng iti ospital.
Maur-uray metlaeng ti resulta ti maysa a 55-anyos a babai a PUI ti Baguio a pimmusay idi March 19 ken naaddaan iti travel history sadiay NCR.
Kabayatanna, sinertipikaran ti Research Institute for Tropical Medicine ti DOH ti Baguio General Hospital and Medical Center Subnational Laboraroty a mangaramid iti independent testing para iti COVID-19 babaen iti realtime polymerase chain reaction.
