[credit to the owner]
BAGUIO CITY – Posible a dimmanon iti 400,000 agingga 500,000 ti bilang dagiti turista a simmangbay ditoy siudad ti Baguio iti napalabas a holiday season.
Iti panakiyuman ti Bombo Radyo kenni Councilor Elmer Datuin, chairman ti Committee on Tourism iti lokal a gobyerno ti siudad ti Baguio, kinunana nga iti pattapattada ket agpada ti bilang ti tourist arrival iti holiday season ti 2017 ken 2016 kas maibasar iti statistical count dagitoy.
Kinunana a napintas ti nasao a datus iti amin nga stakeholders ditoy siudad kas kadagiti negosyante ken dagiti umili nangruna ta amin ket nagnumar iti panagsangbay dagiti adu a turista.
Innayonna a napintas ti tourist arrival iti napalabas a holiday season gaputa patienna a napnek dagiti turista, pakairamanan dagiti umili iti lokalidad kadagiti imparang ken indiaya ti siudad.
Kabayatanna, impeksa ni Councilor Datuin ti panagyaman ti lokal a gobyerno ti siudad ti Baguio kadagiti amin a timmulong iti panakapatalinaed ti linak ken kappia ditoy lokalidad kabayatan ti napalabas a holiday season, nangruna dagiti kameng ti Baguio City PNP, rescue groups, civic groups ken dagiti barangay peacekeeping action teams.
