BAGUIO CITY – Mapagam-amkan ita ti binulan a panakailista ti kaso ti suicide wenno panagkettel iti bukod a biag ditoy siudad ti Baguio kagiddan ti agtultuloy a pandemya.
Sigun ken Ricky Ducas, founder Anxiety and Depression Support Group – Baguio, iti laeng umuna a kwarter ti agdama a tawen ket dumanonen iti lima a kaso ti panagkettel iti biag ti nailistada ditoy lokalidad.
Dinakamatna a kaaduan kadagiti nasao nga indibidual ket lallaki.
Innayonna a naduktalan iti panagadalda a saan a maipeksa dagiti lallaki ti emosyon dagitoy a mangituntunda iti panangpilida a mangkettel laengen iti biagda.
Sigun pay kenni Ducas, karaman ti parikut iti pinansiyal, ti nakaro a panagdandanag, ken ti agdama a sitwasyon gapu iti pandemya kadagiti rason iti panagkettel iti biag dagiti biktima.
Nupay kasta, imbinglayna nga adda ti panakiballaet nga ar-aramidenda kas iti psyco-intervention kadagiti babbarangay nangruna kadagiti nabigbig a lugar a nakalistaan dagiti insidente ti panagkettel iti biag.
