Manamnama nga adalen ti kongreso ti Estados Unidos ti “Birth right citizenship” kalpasan nga inyebkas ni US President Donald Trump a nasken a maamyendaran daytoy.
Iti panakiuman ti Bombo Radyo kenni Jun Delfrado Villanueva, Bombo International News Correspondent sadiay Estados Unidos, kinunana a ti linteg a “Birth right citzenship” ket maipapan iti otomatiko a panakabigbig dagiti indibidual a citizen dagitoy iti nasao a pagilian no naiyanakda sadiay Amerika.
Daytoy ket iti laksid a Pilipino wenno anya a nationalidad ti ina ken no dagitoy ket maysa a turista laeng.
Sigun kenni US President Trump, saanen nga agbalin ti panakaideklara ti maysa a maladaga a US Citizen no daytoy ket naipasngay laeng sadiay Amerika.
Nupay kasta, mabalin dagitoy a mabigbig kas citizen ngem kasapulan a dumalanda iti umno a proseso.
