Agtaltalinaed nga illegal contrabands-free ti Bureau of Jail Management and Penology Male Dormitory iti siudad ti Baguio.
Daytoy ket kasaruno ti pannakaipatungpal ti greyhound ti nasao nga ahensia idi kalman.
Ti greyhound ket maysa nga operasion babaen ti pannakitinnulong ti Philippine National Police ken Philippine Drug Enforcement Agency a mangsukimat kadagiti pagbaludan.
Sigun kenni Jail Officer 1 Ericson Mendoza, Persons Deprived of Liberty Data Management Officer Security and Control Section, adda ti maisaysayangakt a surprise greyhound kaduada ti dua a nasao nga ahensia, dua a daras iti tunggal bulan.
Kinunana pay a maipatpatungpal ti greyhound tapno masigurado nga awan ti iligal a kontrabando a makastrek kadagiti selda.
Malaksid iti dayta, masigurado pay a natalged ti uneg ti selda, maliklikan ti aniaman nga iligal nga aktibidad ken masuportaran ti kampania kontra iti iligal a droga.
Dagiti iligal a kontrabando ket dagiti banag a posible a makadangran kadagiti padada a balud karaman ti iligal a droga, illegal weapons a kas ti natatadem a banag, selpon, ken dadduma pay.
Maibasar iti rekord dagitoy, kadawyan a makumkumpiskarda iti maisaysayngkat a greyhound ket dagiti nuissance contrabands a kas kuma ti ballpen, lapis, kartib, ken dadduma pay.Inlawlawag ni Mendoza ti rason nu apay nga adda dagiti nakumpiskar a nuisance contrabands gaputa sumagmamano kadagiti Persons Deprived of Liberty ket naka-enroll iti Alternative Learning School.
Sigun kenkuana, maisubsubli met dagiti makumkumpiskar a nuisance contrabands nu panawen ti klaseda.
Iti sabali a bangir, bimmaba ti agarup lima pulo ket lima a porsiento ti populasyon dagiti balud iti nasao nga ahensia.
Maibasar iti datos, dumandanon iti agarup 238 a Persons Deprived of Liberty iti agdama a tawen, nababbaba ngem ti nasurok uppat a gasut a Persons Deprived of Liberty idi napalpalabas a tawen.
Gaputa bimmaba ti bilang dagiti balud, naaramat ti tallo a selda kas classrooms, ken duapulo ket uppat laengen ti maar-aramat kas pagbaludan.//Bombo Noveh Organo
