Inyunay-unay ti National Tobacco Administration (NTA) iti publiko nga ilegal iti pagilian a Pilipinas ti black cigarettes wenno tuklaw a sigarilyo.
Impaulog daytoy ti nasao nga ahensia kalpasan a nagwaras ti video online ti tallo nga agtutubo ken rider a nakapadas iti seizure-like symptoms wenno ti saan a ma-kontrol a panagpigerger ti bagi kalpasan ti maatap a panagsigarilioda iti Tuklaw.
Inlawlawag ni NTA Administrator Belinda Sanchez nga awan ti import license ti Tuklaw a sigarilio.
Guyguyuguyenna pay ti publiko a dagus nga ireport kadagiti otoridad no adda ti Tuklaw cigarettes a mailaklako iti lokalidad.
Maibasar iti kaudian a panagadal ti NTA, simrek ti sigarilio a Tuklaw iti pagilian babaen ti panangipuslit kadagiti sangladan a pakairamanan ti Zamboanga, General Santos, Davao ken iti probinsia ti Palawan.
Maatap a naipatulod dagiti illegal a sigarilio babaen ti baybay manipud Indonesia ken Malaysia.
Immun-una a namakdaar dagiti eksperto maipapan iti pangta iti salun-at nga ipaay ti Tuklaw.
Sigun kadagiti eksperto, naglaon daytoy iti agarup 9% a nicotine no sadino nangatngato ngem iti average a 1% agingga iti 3% a linaon dagiti gagangay a sigarilio.
