BAGUIO CITY – Mangipatungpal dagiti otoridad iti blasting operation sadiay Barangay Camp 7, Kennon Road, Baguio City ita nga aldaw mangrugi inton alas onse ti agsapa agingga inton malem.
Sigun iti Office of Civil Defense (OCD) – Cordillera, ti operasion ket para iti pannakaburak dagiti dadakkel a batbato a natnag wenno nagtulid ken naiturong iti paset ti Bued River gapu iti panagtudtudo.
Kinuna ti ahensia a maibilang a pangta kadagiti residente dagiti dadakkel a batbato isut gapuna a nasken dagitoy a maburak iti kabiitan a panawen.
Maiparikep met ti Kennon Road agingga a malpas ti operasion bayat maibakwit met laeng dagiti residente nga agnanaed iti asideg dagiti nagtulid a batbato.
Ipalpalagip met dagiti otoridad ti panagannad dagiti umili sakbay, kabayatan ken kalpasan ti operasyon.
Makipaset iti operasyon ti OCD, DPWH-Cordillera, nagduduma nga istasyon ti pulisya ken dadduma pay.
