Insingasing ni Baguio City Councilor Betty Lourdes Tabanda ti ordinansa a Blood Samaritan Program iti siudad ti Baguio tapno mapapigsa ti boluntario a panagdonar iti dara ken masigurado ti natalged, umdas, ken nalaka a maala a dara, nangruna kadagiti nakurapay a pasiente nga agkasapulan.
Panggep ti maisingsingasing a Blood Samaritan Program Ordinance nga agbalin a linteg ti sistema ti boluntario a panagdonar iti dara iti intero a siudad babaen iti panakitinnulong iti Local Blood Council, ospital, ken accredited blood banks tapno maigarantiya ti agtultuloy a suplay ti natalged a dara para kadagiti pasiente nga agkasapulan.
Ti programa ket maitunos iti Republic Act No. 7719 wenno iti National Blood Services Act of 1994.
Iti sidong ti naisingasing nga ordinansa, adaptaren ti siudad ti nalawag a polisiya a makaguyugoy kadagiti indibidual babaen iti boluntario, non-remunerated blood donation; ken dadduma pay.
Tapno makaala ti blood assistance iti sidong ti programa, kasapulan a mangisubmitir ti request letter manipod iti ospital wenno doktor, maysa a valid ID, barangay certificate of residency iti siudad ti Baguio, ken maysa a certificate of indigency manipod iti City Social Welfare and Development Office (CSWDO). Kalpasan a maberipikar ti City Health Services Office (CHSO), dagos a maipaay ti Blood Endorsement Slip tapno mapatgan ti pasiente a makaala ti kasapulan a dara manipod iti accredited blood bank.
Para iti kaso ti emerhensia, dagiti indigent residents nga agkasapulan a dagos ti dara babaen iti blood transfusion ket mabalin nga agturong a direkta iti City Social Welfare and Development Office babaen ti panangiparang iti request letter ti doktor.
Naaprobaranen ti nasao nga ordinansa iti umuna a pannakaibasa iti Baguio City Council ken naiturong iti Committee on Health and Sanitation, Ecology, and Environmental Protection para iti pannakaadalna.
