Naituding nga ipasidong ti Cordillera Regional Disaster Risk Reduction Management Council (CDRRMC) ti probinsia ti Benguet iti blue alert status manipod Pebrero 22 agingga 27 tapno maipasigurado ti kinatalged ti nasurok 7,000 nga atleta a makipaset iti regional sports meet iti probinsia.
Sigun kenni Albert Mogol, CDRRMC chairman ken Office of Civil Defense director, iti memorandum 15-2026, nakalanad a nangisayangkatdan iti Pre-Disaster Risk Assessment (PDRA) meeting para iti 2026 Cordillera Administrative Region Athletic Association (CARAA) meet inton Pebrero 16 tapno maipasigurado ti kinasaganada ken ti “response readiness” iti kanito nga adda iti kaso iti untoward incidents.
Maibasar iti datos, agarup 7,182 nga atleta, opisial ken coaches ti sumagnbay iti Benguet a mangrugi inton Pebrero 20 sakbay ti grand opening para iti 2026 Cordillera Administrative Region Athletic Association (CARAA) meet inton Pebrero 22.
Agtaud dagitoy manipod Abra a dumanon iti 867; Apayao a dumanon iti 886; Baguio a 884; Ifugao a 764; Kalinga a 677; Mountain Province a 740; Tabuk City a 612 ken 1,038 manipod iti sangapulo ket tallo a munisipyu iti host province a Benguet.
Para met iti seguridad, agarup 231 a police personnel, malaksid pay dagiti force multipliers, ti maideploy iti 137 a billeting areas iti nagduduma a munisipyu iti probinsia ken 52 a playing venues.
Dadduma kadagiti event ket maisayangkat iti Baguio a kas iti gymnastics event a maipatungpal iti Baguio City National High School.
Ti CARAA ket maysa a tinnawen a torneo iti panangpapigsa nga inorganisar iti Department of Education (DepEd) para iti panangpasayaat iti grassroots iti sport iti pagilian.
Pakipaspasetan daytoy dagiti agad-adal manipod iti elementarya ken iti sekundarya, ken dagiti mangabak iti rehion ket mangibagi iti Cordillera iti Palarong Pambansa.
