BAGUIO CITY – Pimmusay ti Board Member ken ti police escort-na kalpasan a nagaburan ti nakidagusanda a balay idi rabii sadiay Dibagat, Kabugao gapu iti mapaspasaran sadiay a saan a nasayaat a sasaaden ti panawen.
Nabigbig dagitoy a da Kabugao Board Member Tolentino ‘Butch’ Mangalao ken PCpl. Romel Gumidam Jr.
Iti interview ti Bombo Radyo kenni Lt.Col. Roderick Condag, Public Information Officer ti Apayao Police Provincial Office, kinunana nga agturong kuma dagiti dua sadiay Calanasan tapnu dur-ay ti bokal iti taripnong ti Barangay Namantugan.
Kinunana a gapu kadagiti lanslide kadagiti kalsada ket saanen a nagtuloy dagiti dua ken nakidagus laengen dagitoy iti balay ni Padu Pugyao.
Dinakamatna a manarimaan ti panagluto ni Pugyao iti kusina ti balay idi nargaay ti daga iti arubayan ti balay a nagresulta iti panakagabur dagiti matmaturog a biktima.
Innayonna a nakalasat ni Pugyao gaputa saan a karaman ti paglutlutwan daytoy iti paset a nagaburan ti daga.
Naamuan nga immuna metten a nagbakwit ti pamilya ni Pugyao ken daytoy laeng ti nabati iti pagtaenganda.
Sigun pay kenni Condag, idi agsapa a nakali dagiti biktima gapu iti karigat ti transportasyon dagiti nagresponde a nagnagna pay iti 12 nga oras.
Iti agdama ket temporaryo paylaeng a naiturong dagiti bangkay iti barangay hall.
