BAGUIO CIYY – Panggep ti Deparment of Environment and Natural Resources (DENR) – Cordillera a mangisayangkat iti panagsanay iti body massage para kadagiti porters ken tour guides iti Mt. Pulag sadiay Kabayan, Benguet.
Sigun kenni DENR-Cordillera regional director Ralph Pablo, tarigagayda nga ipaayan iti dadduma a panggedan dagiti tour guide sadiay.
Kinunana a napintas ti nasao a trabaho para kadagitoy gaputa mabalinda nga idiaya ti panag-masahe para kadagiti turista a nabambannog manipod iti panagsang-atda iti bantay.
Gapu iti daytoy, kinunana a makikokoordinarda ita kadagiti dadduma nga ahensia ti gobierno a mabalin a mangipaay iti panagsanay kadagiti benipisaryo iti Mt. Pulag.
Innayonna nga iti kanito nga agballigi iti nasao a panggep ket nasken a mangbukel dagitoy iti pagalagadan para kadagiti porters ken tour guides tapnu awan ti rumsua a parikot iti kanayunan a pagsapulan dagitoy.
