Boga ti naobserbaran dagiti otoridad a kangrunaan a nakaitunda iti firecracker-related incidents iti rehiyon Cordillera kabayatan ti holiday season.
Iti panakiuman ti Bombo Radyo kenni Police Lieutenant Colonel Carol Lacuata, Spokeperson ti Police Regional Office-Cordillera, amin dagiti probinsya iti rehiyon pakairamanan ti siudad ti Baguio ket nakailista iti firecracker-related incidents.
Ti probinsya ti Abra ti nakailista iti kaadwan a bilang iti nadakamat nga insidente bayat a ti probinsya met ti Ifugao ti nakailista iti kabassitan nga insidente a dumanon laeng iti maysa.
Malaksid iti boga, adda metlaeng ti nailista a kaso gapu kadagiti daduma pay a klase iti palibang ken maysa nga indiscriminate firing nga iti agdama ket natamingen ken nakaawiden iti pagtaenganda.
Mainaig iti dayta, manarimaan paylaeng ti panangimbistigar dagiti otoridad iti nadakamat a kaso ti indiscriminate firing.
Iti baet dagiti nilista a kaso ti firecracker-related incidents, nagtalinaed a generally peaceful ti pakabuklan a panakarambak iti holiday season iti Rehiyon Cordillera.//Bombo Mera Pacpacan
