![](https://img.bomboradyo.com/baguio/2021/04/binary-fountain-telemedicine-patient-experience.jpg)
BAGUIO CITY – Iyap-apela ti lokal a gobyerno ti Baguio ti panag-volunteer dagiti kanayonan a health practitioners para iti ‘Bantay Covid’ a telemedicine digital platform ti siudad.
Maar-aramat ti nasao a platform tapnu maserbian dagiti pasyente iti siudad a naka-home quarantine ita gapu iti COVID-19.
Naamuan nga iti kaudian a taripnong dagiti opisyales ti siudad ket kiniddaw ti mayor ti panangtaripnong ni City Health Officer Dr. Rowena Galpo kadagiti grupo dagiti doktor tapnu kasaritana dagitoy ken ipalagipna ti immuna a commitment dagitoy iti panagboluntaryo iti programa kas paset ti community social responsibility dagitoy.
Makidkiddaw ti panagrehistro dagiti volunteer medical practitioners iti website a www.telemedicine.baguio.gov.ph.
Sigun kenni Dr. Galpo, iti agdama ket nasurok iti 1,900 dagiti pasyente a naka-home isolation ken ti telemedicine platform ti Baguio ket addaan ti 33 a volunteer health workers composed a bukbuklen ti 12 a medical doctors, 11 a personnel ti CHSO ken 10 a volunteers.
Kinunana nga ita laeng a bulan ket 53 a tawag dagiti pasyente ti naawat dagitoy ken 30 a pasyente ti agdama a maipaspasidong iti panagwanawan iti telemedicine.
Kiniddaw pay ti mayor ti panakaipasidong iti panagsanay dagiti telemed volunteers nangruna ta kurang dagiti isolation ken
quarantine facilities ti Baguio a mangakomodar iti manamnama a panagngato iti kaso ti COVID-19 gapu iti Omicron variant isut gapuna a maar-aramat ti home quarantine para kadagiti asymptomatic, mild wenno moderate cases ti nasao a sakit.