BAGUIO CITY – Nangrugi manen ti boluntaryo nga isusuko dagiti drug personalities kadagiti babbarangay ken istasyon ti pulisya ditoy siudad ti Baguio.
Sigun kenni PCI Gil Imado, station commander ti Baguio City Police Office (BCPO) – Station 2, simmuko iti opisinada ti lima nga indibidual nga addaan iti pakainaigan iti iligal a droga.
Kinunana a nagtaud dagitoy iti nagduduma a barangay iti masakupan ti BCPO – Station 2 ken bin-ig dagitoy a lallaki nga adda iti legal a tawen.
Maibasar iti pannakipatang ti pulisya kadagiti nasao a drug personalities, naammuan a kadawyan a trabaho dagitoy ket construction worker ken driver.
Sigun kenni Imado, tarigagay dagiti simmuko a drug personalities ti pannakadalus ti nagan dagitoy tapno nalaklakada a makaala iti police ken NBI clearance.
Kasaruno iti daytoy ket al-allukuyen ti BCPO ti dadduma pay a drug personalities a sumukon dagitoy kadagiti istasyon ti pulisya ken kadagiti opisial ti barangay dagitoy.
