BAGUIO CITY – Al-allukuyen ni FO1 Brian Mader-an, personnel ti Baguio Fire Department dagiti kakadwana nga uniformed personnel ken dagiti indibidual nga adaan iti nawadwad a taraon ken pinansyal iti panagdonarda para kadagiti agkasapulan ti tulong ita a panawen ti krisis.
Immunan a nangipaay daytoy iti tulong kadagiti PWDs sadiay Taidangan, Tuba ken ti P32,000 a makabulan a sweldona ti binusbosna.
Sigun kenkuana, dakkel a banag ti panangipaay iti tulong kadagiti agkasapulan ita a panawen.
Innayonna a babaen iti tulong ni Jean Kidpalos a kadwana nga organizer para iti panangipaay iti tulong ket mangipaayda metlaeng iti maikadwa a tulong kadagiti PWDS ken puntiryada met nga ipaayan ti food packs ti 50 a pamilya.
Dinakamatna pay a dagiti naipaayda ket bagas, de-lata, taraon dagiti ubing ken dadduma pay.
