BAGUIO CITY – Naisayangkat ti Oplan Broadcastreeing wenno ti panagmula kadagiti puon ti kayo babaen kadagiti miyembro ti Kapisanan ng mga Broadcaster ng Pilipinas (KBP) – Baguio-Benguet Chapter iti paset ti South Drive, Baguio City.
Nakipaset ti 13 a radio stations a miyembro ti KBP, pakairamanan ti Bombo Radyo Baguio iti nasao a tinawen a corporate social responsibility ti organisasyon.
Inmula dagiti miembro ti dumanon 40 nga arabica coffee.
Tarigagay met ti KBP – Baguio-Benguet Chapter a maipasigurado a dumakkel dagitoy ken mataripato a naimbag.
Daytoyen ti maikatlo a tawen iti panangimula ti KBP – Baguio-Benguet Chapter kadagiti babassit a kayo gaputa kadagiti imun-una a tawtawen ket nagmula dagiti miembro iti dadakkel a kaykayo kas iti nara, pine tree ken dadduma pay.
Dumanon metten iti siyam a tawen a maisaysayangkat ti Oplan Broadcastreeing babaen kadagiti miembro ti KBP iti entero a pagilian. (with Bombo Nikki Agsiweng)
