Inaprobaran ti dua pulo ket dua a senador ti maysa a resolution a mangitudtuding iti pannakasuspendir paylaeng ti implementasyon ti Public Transport Modernization Program (PTMP), a sigud a maaw-awagan kas PUV Modernization Program.
Sigun kadagiti senador, rumbeng a masuspendir ti nasao a programa agsipud ta saan unay a naplano ken naidardaras ti modernization program.
Daytoy ket agsipud ta adu latta dagiti pakaseknan iti nasao a programa a pakairamanan ti saan a panagkonsolidate dagiti dadduma, nangina a presyo dagiti moderno a lugan, ken dadduma pay.
Iti sabali a bangir, panggep met dagiti nakapag-consolidate a jeepney operators nga agprotesta no masuspendir ti modernization program.
Nadismaya dagitoy iti resolusyon ti senado ken impettengda a mas ad-adu ti bilang dagitoy a nangikagumaan a simmurot iti nasao a programa gapu ta ti ammoda ket saaen a malapdan ti nasao a programa, ken adu metten ti insakripisyo dagitoy.
No apay ket ngamin aya nga ita laeng a naipasa ti nasao a resolusyon.
Pudno nga adu ti isyu ken saan a naikonsidera iti implementasyon ti PUV modernization program ngem rumbeng a saan a maisardeng daytoy no di ket in-inut a maipatungpal babaen iti tulong ken panangsolbar ti gobyerno kadagiti pakaseknan dagiti saan pay a nakapagconsolidate kasta met dagiti nakapagconsolidate a naggastosen iti dakkel a gatad wenn dagiti nag-utang tapno laeng makagatangda iti baro a unit dagitoy.//ASP
