BAGUIO CITY – Naminsan manen a pinadayawan ti Philippine Red Cross Baguio City Chapter ti Bombo Radyo Philippines, partikular ti Bombo Radyo ken Star FM Baguio, kas Hall of Fame Awardee kagiddan ti National Blood Donors Month Celebration.
Daytoy ket gapu pay laeng iti agtultuloy a panangsuporta ti Bombo Radyo iti panakaital-o ti boluntaryo a panagidonar iti dara babaen iti mass blood donation activities.
Segun kenni Anastacia Tamayo, chapter administrator ti PRC Baguio City Chapter, iti las-ud ti sangapulo ket uppat a tawen ket nakaipaay iti 1, 900 units ti dara ti blood letting activity ti Bombo Radyo ken Star FM Baguio.
Kinunana met a saan nga agkurkurang ti suplay ti dara ditoy siudad ti gaputa adu latta dagiti agidondonar iti dara.
Innayunna a padpadaananda ita ti Dugong Bombo nga ipatungpal ti Bombo Radyo inton bulan ti Nobyembre tapnu matulongan ti ad-adu pay nga umili.
Malaksid kadagiti nadumaduma nga organisasyon ket nabigbig met laeng kas Blood Galloner ni Bombo William Luczon, OIC ti Bombo Radyo Baguio, gapu iti sangapulo ket maysa a tawen a panagidondonarna iti dara.
