Nakasaganan dagiti sumagmamano nga ospital para iti panangagas kadagiti biktima ti palibang wenno paputok.
Iti Jose R. Reyes Memorial Medical Center sadiay Manila, nakasaganadan a mangawat kadagiti pasiente a biktima ti paputok.
Kas palagip iti publiko kontra panangputol kadagiti ima dagiti biktima ti masungad a selebrasion ti baro a tawen, impakita ti nasao nga ospital dagiti kagawaanda a mangopera kadagiti nadangran.
Karaman ti ragadi ti tulang, panangputol iti ramay, ken hand retractor sets tapno nalaklaka a maoperaan ti ima ti pasiente.
Adda pay iti fireworks related injury area a pakaaramidan ti assessment, inisial a pannakaagas ti pasiente, pakairamanan ti injection kadakuada iti anti-tetanus ken antibiotics.
Nangireserba metlaeng dagiti ospital dagiti kama kadagiti wards para kadagiti pasiente.
Manipod idi Disiembre 21 agingga idi malem ti Huwebes, nakailista ti nasao nga ospital ti siam a fireworks related injuries.
Tallo kadagitoy ti nagpaputok, ken innem met ti naputukan manipod kadagiti paputok a sabali ti nangsindi.
Kabayatanna, palagip dagiti doktor a kalpasan a nadangran gapu iti paputok, ugasan iti “running water” ti nadangran a paset ti bagi.
Nu nakatilmon ti watusi wenno dadduma pay a makasabidong a paputok, balakad ti doktor nga uminum iti puraw nga itlog ken dagos nga iturong ti pasiente iti ospital.