Naobserbaran ti adu latta a panagsangbay dagiti sumarsarungkar kenni actor turned politician Ramon “Bong” Revilla iti pagbaludan.
Ni Revilla ket nakabalud ita iti Quezon City Jail Male Dormitory kalpasan a simmunko kadagiti otoridad idi Lunes, January 19 gapu iti pakainaiganna iti maatap a ghost flood control project idiay Pandi, Bulacan nga agbalor iti ₱92.8 million.
Karaman kadagiti simmarungkar ti asawana a ni Cavite 2nd District Representative Lani Mercado ken ti anak daytoy a ni Gianna.
Adda dagiti magsupsuporta kenni Revilla a nagturong iti pagbaludan tapno mangipaay iti taraon a pinalubusan met dagiti kameng iti BJMP.
Kagiddan dayta, inruar metten ti Department of the Interior and Local Government(DILG) ken ti Philippine National Police(PNP) ti mughot ni Revilla ken dagiti innem nga indibidwal a kadwana a pinilaan ti Ombudsman iti kaso a malversation.Kabayatanna,immuna metten a nangipaay ni Revilla iti piansa a ₱90,000 para iti sabali pay a kaso daytoy a graft mainaig metlaeng iti nakairamanan daytoy nga anomalya iti kapada a proyekto.
