BAGUIO CITY – Plano dagiti mayor iti munisipyo ti La Trinidad, Itogon, Sablan, Tublay, ken Tuba wenno iti LISTT area ti panakaipatungal ti istrikto a border restriction kas iti inaramid ni Mayor Benjamin Magalong ditoy siudad ti Baguio.
Iti interbyu ti Bombo Radyo Baguio ken Itogon Mayor Victorio Palangdan, kinunana a daytoy ti nagbalin a desisyon dagiti BLISTT Mayors kalpasan ti naangay a panagtataripnong dagitoy idi kanikadua.
Kinunana a nakumpirmar ti inruar ti DOST-Vaccine Expert Panel a listaan dagiti babbarangay ditoy rehiyon partikular ditoy BLISTT areas a karaman iti pakaisayangkatan ti Vaccine Trial ti pagilian gapu iti nangato nga attack rate iti COVID-19 kadagitoy.
Sigun kenkuana, maibasar metlang daytoy iti report dagiti Mayors iti naangay nga panagtataripnong dagitoy.
Mangnamnama ni Palangdan a babaen iti implementasion ti border restriction ket ad-adda a makontrol ti panagnagto ti kaso ti COVID-19 iti BLISTT areas ken iti kabangibang a probinsia.
Inlawlawagna nga urayenda pay ti pammalubos ken rekomendasyon ni Benguet Governor Melchor Diclas ken ti koordinasionda kadagiti nagduduma nga LGUs iti panggep a border restrictions.
